Zəlimxan Yaqubun şeirləri Gürcüstan portalında

Zəlimxan Yaqubun şeirləri Gürcüstan portalında

Gürcüstanın populyar Gaxa.ge portalı Dövlət Tərcümə Mərkəzinin “Azərbaycan ədəbiyyatı beynəlxalq virtual aləmdə” layihəsi çərçivəsində Azərbaycanın Xalq şairi Zəlimxan Yaqubun gürcü dilinə tərcümə olunmuş “Azərbaycan torpağıyam” və “Mənə ümid kimi bax” şeirlərinin yayınına başlayıb.

Şairin yaradıcılığı haqqında geniş məlumatla təqdim olunan şeirlərin gürcü dilinə tərcümə müəllifi – Dövlət Tərcümə Mərkəzinin gürcü dili mütəxəssisi, tanınmış şair-tərcüməçi İmir Məmmədlidir.

Qeyd edək ki, əsasən gürcü ədəbiyyatının aparıcı simalarının yaradıcılığını işıqlandıran portal Dövlət Tərcümə Mərkəzi ilə əməkdaşlıq çərçivəsində Azərbaycan ədəbiyyatının yayınına xüsusi yer ayırır.

 

 


Zəlimxan Yaqub:

   (1950 – 2016)


·        Azərbaycanın Xalq şairi, ictimai xadim;

·        1950-ci ildə Gürcüstanın Bolnisi rayonunun Kəpənəkçi kəndində anadan olub; 

·       “Şair harayı”, “Sizi qınamıram”, “Od aldığım ocaqlar”, “Mən sənin qəlbinə necə yol tapım”, “Böyük ömrün dastanı”, “Qayıdaq əvvəlki xatirələrə”, “Gözlərimin nurudu doğulduğum bu torpaq”, “Mən bir dağ çayıyam” kimi şeir kitablarının müəllifidir;

·        1995–2005-ci illərdə Azərbaycanın Milli Məclisinin deputatı olub;

·        Azərbaycanın “Şöhrət”, Gürcüstanın “Şərəf” ordeni ilə təltif edilib.

 

 


AZƏRBAYCAN TORPAĞIYAM

 

Bu dağ mənim öz dağımdı,

Mən bu dağın bulağıyam.

Çəmənində közə dönmüş

Şölələnmiş çırağıyam.

 

Bu daş mənim öz daşımdı,

Öz tarixim, öz yaşımdı.

Qaya məğrur qardaşımdı,

Onun səsi, sorağıyam.

 

Bu yol mənim öz yolumdu,

O tay, bu tay sağ-solumdu.

Xəzər sinəm, Kür qolumdu,

Xan Arazın fərağıyam.

 

Seçməliyəm tükdən tükü,

Ağırdı çiynimin yükü.

Köküm Dədə Qorqud kökü,

Qaracoğlan bulağıyam.

 

Deməsinlər gəldi-gedər,

Keçirmərəm ömrü hədər.

Öləndə də qəbrim qədər

Azərbaycan torpağıyam!

 

 

 

 

MƏNƏ ÜMİD KİMİ BAX!

 

Mənə ümid kimi bax-doğruldum gümanını,
Mənə işıq kimi bax-dağıdım dumanını!
Mənə inam kimi bax-sinə gərim çətinə,
Mənə sevgi kimi bax-dönüm məhəbbətinə!
Mənə səhər kimi bax-çevrilim sabahına,
Mənə sevinc kimi bax-nöqtə qoyum ahına!
Mənə bahar kimi bax-yaşıllanım,allanım,
Mənə payız kimi bax-şirələnim,ballanım!
Mənə həyat kimi bax-hər gün qaynayım,daşım,
Bax,mənə necə baxır atam,anam,qardaşım.
Nə qədər ki,baxırsan mənə barmaqarası
Qəti sağalan deyil üreyimin yarası!
Demək qəlbimdə kədər,demək sinəmdə dağsan
Bu gedişlə,ey insan,
Nə mən yüksələcəyəm,nə sən ucalacaqsan!

 

 

https://gaxa.ge/Read/200371                                                             

 

 

VƏ DİGƏR...