Görkəmli Azərbaycan yazıçısı və ədəbiyyatşünası Mir Cəlalın dahi Azərbaycan şairi Məhəmməd Füzuli yaradıcılığından bəhs edən “Füzuli sənətkarlığı” kitabı ərəb dilinə tərcümədə İordaniyada işıq üzü görüb.

Dahi şairin 530 illik yubileyinə töhfə olaraq ərsəyə gətirilmiş kitabın ön sözünün müəllifi – tanınmış İordaniya yazıçısı və ədəbiyyatşünası Samih əl-Məhariq, əsərin ərəb dilinə tərcümə müəllifi – Dövlət Tərcümə Mərkəzinin ərəb ölkələri ilə ədəbi əlaqələr üzrə koordinatoru, tərcüməçi Fərid Camalovdur.

Zəngin ənənəli “Əl-Əzminə” nəşriyyatında nəşr edilmiş kitabın yaxın günlərdə İordaniyanın mərkəzi kitabxanalarına, universitetlərinə və kitab evlərinə yerləşdiriləcəyi gözlənilir.