İstanbul, 11 noyabr, AzərTAc
Xəbər verdiyimiz kimi İstanbulda keçirilən 33-cü Beynəlxalq kitab sərgi-yarmarkasında ölkəmizi Azərbaycan Respublikasının Nazirlər Kabineti yanında Tərcümə Mərkəzi təmsil edir.
Mərkəzin əməkdaşı Fərid Hüseynov AzərTAc-a bildirib ki, təmsil etdiyi qurumun sərgidə Azərbaycan və dünya ədəbiyyatı ilə bağlı nümayiş etdirdiyi nümunələr maraqla qarşılanıb. Ziyarətçilərə Azərbaycan Tərcümə Mərkəzinin yaranması, onun qarşısında duran vəzifələr və fəaliyyəti ilə bağlı məlumatlar verilib.
Sərgidə əlaqələri genişləndirmək üçün əlverişli fürsət yarandığını diqqətə çatdıran F.Hüseynov bildirib ki, Azərbaycan Tərcümə Mərkəzi üzərinə düşən vəzifələri layiqincə həyata keçirmək üçün kitabçılıq sahəsində beynəlxalq təcrübəni öyrənməkdə maraqlıdır. O cümlədən, Azərbaycanın ədəbi, mədəni və elmi irsinin dünyada tanıdılması və təbliği, eləcə də dünya ədəbi, bədii, mədəni və elmi fikrini ifadə edən maraqlı nümunələrin Azərbaycan dilində tərcüməsi mərkəzin qarşısında duran əsas vəzifələrdəndir.
Sərginin təşkilat komitəsinin kataloqunda yer alan Azərbaycan Tərcümə Mərkəzi bundan sonra Türkiyə Yayımçılar Birliyinin bütün sərgilərinə dəvət olunacaqdır.
Qeyd edək ki, sərgi çərçivəsində mərkəzin nəşri olan “Xəzər” jurnalının müxtəlif nömrələrindən çoxsaylı nümunələr ziyarətçilərə təqdim edilib.

Sabir Şahtaxtı
AzərTAc-ın xüsusi müxbiri
İstanbul