Klarada bu fitri istedadı duymuş Leypsiq Pedaqoji Gimnaziyasının sahibəsi Avqusta Şmidt onun ödənişsiz təhsil almasına imkan yaradır. O dövrdə   belə  bir imtiyaz nadir uşaqlara verilirdi. Sahibə əmin idi ki, Klara pedaqogika sahəsinin nadir nümayəndələrindən olacaq.

Amma Tanrı bu qıza başqa tale yazmışdı... 

Sosial-demokratların məxfi iclaslarından birində gələcək həyat yoldaşı – rus mühacir Osip Setkinlə tanışlıq Klaranın təsəvvürlərini, dünyaya baxışını tamamilə dəyişir. Dünyaya iki övlad gətirən Klara inqilab nəzəriyyələrinə yiyələnərək siyasi olimpin görkəmli fiqurlarından birinə çevrilir. 1989-cu ildə təşkil olunan beynəlxalq konqresdəki məşhur çıxışında o, qadın hüquqlarının qorunmasını mühüm bir məsələ kimi ortaya çıxarır. Klara redaktoru olduğu “Hlyayhayt” jurnalında fəhlə qadınların hüquqlarının müdafiəsinə qalxır, tez-tez fabrik və zavodlara, yoxsul insanlara baş çəkir, insan, qadın hüquq və azadlıqları mövzusunda minlərlə məqalə qələmə alır, mitinqlər və yürüşlər təşkil edir.

1915-ci ildə Klara saxta bir ittihamla – Vətənə xəyanət ittihamıyla həbs edilir, lakin xalqın təzyiqi ilə azadlığa buraxılırsa da, nə həbsxana həyatı, nə təzyiq və təqiblər onu amalından, məqsədindən döndərə bilmir.

1932-ci ildə Almaniyada hakimiyyətə gələn Hitler rejimi bütün solçu partiyaların fəaliyyətinə qadağa qoyduğundan Klara SSRİ-yə mühacirət etməyi qərara alır və yorulmaz siyasi-ictimai fəaliyyətini orada davam etdirir.

Həyatının son dövrünü SSRİ-də yaşayan və artıq gözləri tamamilə tutulan inqilabçı qadın 1933-cü ildə Moskvada vəfat edir, adı isə 8 Mart Beynəlxalq Qadınlar Gününün təşəbbüskarı və dünyanın ilk feminist qadınlarından biri kimi tarixə əbədi həkk olunur.

Klara Setkin məhrumiyyətlər dolu, ağır, əzablı bir həyat yaşadı, 8 Mart isə 100 ildən çoxdur ki, dünyanın bayram əhval-ruhiyyəli günü kimi qeyd edilir, bütün dünya qadınları bu günü gül-çiçək və sevinclə qarşılayır.