İmam Şamilin ən yaxın silahdaşlarından biri, avar əsilli Hacı Muradın (1790-1852) kəlləsinin qalıqları dəfn olunmaq üçün Azərbaycana veriləcək. Rusiyanın mədəniyyət naziri Vladimir Medinskinin müvafiq əmrinə əsasən, bu işlə xüsusi yaradılmış dövlətlərarası komissiya məşğul olacaq.

Dahi rus yazıçısı Lev Tolstoyun povestinin personajına çevrilmiş avar sərkərdənin mumiyalaşdırılmış başı uzun müddət Sankt-Peterburqda yerləşən Kunstkamerada, sonra isə Rusiya Dövlət Din Tarixi Muzeyində saxlanılıb.

2000-ci illərdə eksponat Rusiya Elmlər Akademiyasının xüsusi saxlanc kamerasına yerləşdirilib.  Məşhur sərkərdənin sümükləri isə Şəki şəhəri yaxınlığında dəfn olunub.

Hacı Muradın kəlləsinin qalıqlarının qaytarılması ətrafında mübahisələr çoxdan davam edir. Belə hesab olunur ki, XIX əsrin birinci yarısında baş vermiş Şimali Qafqaz müharibəsinin məşhur iştirakçısı Dağıstanın Xunxaz kəndindəki ailə məzarlığında şəriət qanunlarına uyğun dəfn olunmalıdır.